Sosiyete y’umuherwe Elon Musk yashyize mudasobwa mu bwonko bw’umuntu bwa mbere

Umuherwe, Elon Musk, aravuga ko isosiyete ye ya Neuralink yinjije neza kamwe mu twuma twayo twa “wireless brain chips” mu bwonko bw’umuntu ku nshuro ya mbere.

Yavuze ko ibisubizo bya mbere bitanga icyizere kandi uwatewemo aka kuma wagereranya na mudasobwa arimo kumererwa neza.

Intego y’iyi sosiyete ni uguhuza ubwonko bw’abantu na mudasobwa kandi ivuga ko ishaka gufasha guhangana n’indwara zo mu bwonko zigoye kuvura.

Amasosiyete ahanganye n’iyi yamaze gushyira utwuma nk’utu mu bantu.

BBC ivuga ko yegereye Neuralink ndetse n’Ikigo cy’igihugu gishinzwe kugenzura ibiribwa n’imiti muri Amerika (FDA), kugira ngo bagire icyo babivugaho.

Isosiyete ya Elon Musk yahawe uruhushya na FDA rwo kugerageza iyi chip ku bantu muri Gicurasi, iyi ikaba ari intambwe ikomeye nyuma yo kumara igihe isaba kwemererwa.

Ibi byatanze uburenganzira bwo gutangira ubushakashatsi bw’imyaka itandatu aho hakoreshwa robot mu gushyira udutsinga 64 duto cyane kurusha umusatsi mu muntu, mu gice cy’ubwonko kigenzura “ubushake bwo kugenda”, nkuko Neuralink ivuga.

Isosiyete ivuga ko izi nsinga zituma ako kuma gahabwa ingufu na bateri ishobora gucagingwa bidasabye gucomeka (charged wirelessly) gashobora kubika no gutanga signal ziva mu bwonko kuri application igena uko umuntu ashaka kunyeganyega.

Abinyujije ku rubuga nkoranyambaga rwe rwa X rwahoze ari twitter, Elon Musk yavuze ko « product ya mbere ya Neuralink izaba yitwa telepathy. » Telepathy wavuga ko ari nk’amarangamutima yo kumva ushaka gutumanaho n’umuntu uri kure binyuze mu ntekerezo.

Yavuze ko Telepathy izafasha “kugenzura terefone yawe cyangwa mudasobwa yawe, kandi binyuze muri ibyo bikoresho ukaba wagenzura igikoresho hafi icyo ari cyo cyose, binyuze mu gutekereza gusa”.

Yakomeje agira ati: “Abazayikoresha bwa mbere ni ababuze gukoresha ingingo zabo (amaboko cyangwa amaguru).”

Mu gihe Musk ari guharanira kuzamura profile ya Neuralink, afite abo bahanganye, bamwe muri bo bamaze imyaka igera kuri 20 bakora ku ikorabuhanga nk’iri. Urugero ni Ikigo cyo muri Leta ya Utah cyitwa Blackrock Neurotech cyashyize bwa mbere mudasobwa mu bwonko bw’umuntu mu 2004.

Loading

Share