Ibitabo bitanu ukwiye gusoma niba uri mu kigero cy’imyaka iri hagati ya 20 na 30.

 

 

Iyo umuntu ageze mu kigero cy’imyaka iri hagati 20 na 30, aba ageze mu gihe cyo kwitekerezaho cyane ku nzira akwiye kunyuramo n’ibyo akwiye gukora, akaganisha ubuzima bwe mu cyerekezo kizima.

 

Birashoboka ko wakwigira kuri bimwe mu byo abandi banyuzemo muri iyi myaka, cyane cyane ababashije kugira icyo bigezaho mu buzima.

Abenshi bagiye bandika ibitabo ku bijyanye n’uko ukwiye kwitwara, n’ibyo ukwiye gushyira imbere kugirango ubashe kuba uw’umumaro ndetse witeze imbere.

Abanditsi barimo Robert T. Kiyosaki, Simon Sinek, Jeff Keller bagiye bandika ibitabo byibanze ku bintu ukwiye kwimenyereza ubu, bizagufasha mu bihe bizaza by’iterambere.

Attitude Is Everything: Change Your Attitude … Change Your Life!

Iki ni gitabo cyanditswe na Jeff Keller, umwanditsi w’ibatabo ukomeye wo muri Leta Zunze Ubumwe za Amerika, mu 1999.

Muri iki gitabo yagiye agaruka ku kuntu imyitwarire y’umuntu ishobora kumubera inzitizi y’iterambere, cyangwa isoko yaryo.

Muri iki gitabo, yigishije ko niba ushaka kugera ku kintu runaka ubanza guhindura uburyo utekereza, ndetse ugahiga umuhigo, kuko ariwo ugutera gukomeza mu gihe abandi babona byanze.

Ariko nanone kubera intego uba wihaye, bigusaba gukora igishoboka cyose kugirango ibyo wiyemeje ubigereho.

Muri iki gitabo, Jeff Keller agaruka ku ngingo nyinshi zerekeye guhindura imyitwarire zirimo kuba wahindura ibibazo byawe amahirwe wakoresha, kwibona mu nzira yo gutera imbere, kureka kwinubira ubuzima ugahura n’abantu bafite ibitekerezo byubaka, n’ibindi.

Rich Dad Poor Dad

Iki ni gitabo cyanditswe n’umumwanditsi akaba n’umunyemari, Robert T. Kiyosaki uyobora sosiyete ikomeye ya Rich Global LLC, ikora ibijya ni mashini zo mu nganda muri Leta Zunze Ubumwe za Amerika.

Yanditse iki gitabo afatanyije na Sharon Lechter, umwanditsi w’ibitabo akaba n’umucungamari.

Robert agaruka ku kuntu abantu basigaye bakorera amafaranga, kandi amafaranga ariyo yagakwiye kubakorera.

Yigishijemo uburyo umuntu ashobora guhera ku mafaranga make cyane, akayakoresha neza agatera imbere, ndetse yerekana ko nta muntu wavutse akize, ahubwo byose abiharanira.

The 48 Laws of Power

Iki ni gitabo cyanditswe na Robert Greene wo muri Leta Zunze Ubumwe za Amerika, mu 1998.

Agaruka ku nyungu zo gusobanukirwa imbaraga wagira ku bandi, kuzibyaza umusaruro, ndetse no kwirinda ko imbaraga z’abandi zakugiraho ububasha.

Muri iki gitabo, Robert Greene avuga ku ngingo zo kuba wakwirinda guha icyizere inshuti zawe, ahubwo ugakunda gukoresha abanzi bawe.

 

Avuga ko iteka ryose inshuti ishobora kukugambanira kuko uba warayibwiye ndetse ukayeraka byinshi by’ubuzima bwawe.

Ariko mu gihe wakoresheje umwanzi wawe, iteka aba ahiga ku kwereka ko na we ashoboye.

The 48 Laws of Power ni igitabo kigaruka ku ngingo 48 z’amategeko agenga imbaraga, harimo kuba umuntu akwiye kuvuga amagambo make akenewe, guhora uri uw’umumaro abantu bakagukenera, n’ibindi.

How to Win Friends and Influence People

Iki ni igitabo cyanditswe na Dale Carnegie wo muri Leta Zunze Ubumwe za Amerika, mu 1936.

Ni igitabo kigaruka ku kuntu ushobora kuba umuntu ukunzwe, ubasha kubana n’abandi neza, ndetse ukaba umwe mu bo bizera ko wabagira inama utaberetse ko ubarusha ubwenge, ahubwo muri kungurana ibitekerezo.

Muri iki gitabo, umwanditsi agaruka ku kamaro ko gushima, ukereka umuntu ko uha agaciro umwanya atanga mu buzima bwawe, guha agaciro ibyo akubwira ndetse ukamutega amatwi, no kwirinda kuburana na we ngo umwereke ko ibyo akubwira, uzi ibirenzeho.

The 7 habits of highly effective people

Iki ni igitabo cyanditswe na Stephen R. Covey wo muri Leta Zunze Ubumwe za Amerika, mu 1989.

Yanditse ko mu gihe ushaka kugira impinduka mu mikorere yawe bigatuma utera imbere, impinduka zikwiye kubanza kugaragara muri wowe.

’The 7 habits of highly effective people’ bisobanura ingeso zirindwi ziranga abantu bakora neza.

Barangwa no gushyira imbere ibintu by’ingenzi, ibindi bikaza nyuma. Bitondera ibyemezo bafata, mu gihe bari mu kiganiro n’abandi babanza gusobanukirwa ibyo bavuga, bakabona gusobanura uko na bo babyumva.

 

share

Loading

Share